流金歲月

．


四年前的八月同九月


當年仲係大學一年級的我是半島酒店嘉麟樓月餅的Promoter ，每天穿著小鳳仙在客人中穿插口中不停說著:「 Moon cake Moon cake , buy some moon cakes 」再說自編自導自演的中秋故事。當然，我呢個promoter可以免費任食。所以我每日至少一個人食十幾個當零食，日日食，足足食左兩個月。到今時今日一諗起嘉麟樓月餅仲想嘔......

＿＿＿＿＿＿＿＿＿＿＿＿＿＿



由中五開始，讀書年代的我，勞碌如牛的命運已不幸的開始。


同過十多個小朋友補習，賣遊戲機，在採購工司做實習，在北京政府某機構做二打六，在數間名店做sales , 幫酒店做妹仔賣月餅， 幫PR公司搞fashion show ，拋個身出去借比人做內衣的fitting model, 幫人做有錢收的功課，在迪士尼水上樂園賣雪糕，推ＢＢ車，做Sales, 幫professor 做researcher ，幫大學推銷校友會package，幫Marketing公司做researcher 等等。


雖然我係MADE IN HK, 但我是有骨氣有尊嚴的女人！！（除了分手時碌爆佢pk張附屬卡之外）我當年讀書時個個月亂fing的皮幾兩皮野，也是本小姐一手一腳一血一汗賺番黎！


以上工作除了contract 的，全部工作以年計來做，同時身任四職濕濕碎，大學時試個一個月賺數萬元你信唔信？！！回想以上一大堆工作，每每想起中五時賣遊戲機也會會心微笑..........


中五會考後的夏天，我因為避雨的關係跑了入當年龍蛇混雜的深水埗黃金商場，意外地又無無聊見到有鋪頭請人，瞻粗粗跑去面試。當年媽媽極力反對我在那裡工作，但礙於本小姐極大的好奇心，最後我說了個大話便跑了去開工。頭一個星期返工，已經識哂商場中的大佬大哥，打個招呼打好關係，咩都無有怕。（ 本人絕非幫會人仕，本人一生只忠心於一個幫會大佬叫耶穌 ）當年的黃金商場實有不少黑社會的背景人仕，但其實他們本質也不太壞，但....也很不能得罪 。


好記得當年對面鋪，有一個男人在無理取鬧，大叫大喊：「 呢間鋪頭呃人，唔好幫襯佢。」三十秒之後，四個青年一人一手啤酒樽，兜口兜面，四個樽打落去，個男人流住成面成身血大叫救命。你估現場邊個敢幫佢報警？（你試下叫呢條女去當年黃金商場串下個short manager , 我諗佢死十次都唔夠。 )當年只有十六歲的我，簡直好似睇緊live的浩南哥系列。


一天後，場中一個大阿哥經過我的鋪頭一手放下兩盒檸檬茶，一邊說：「佢個闔家富貴再試下係我個場玩野？！腳都斬能斷佢。」一口喝著檸檬茶我一面說：「係你爆佢樽？？！！」大阿哥：「你下次等耐Ｄ先報警ma, 等佢流多Ｄ血嚇下佢個仆街。仲有呀....你開學就返去讀書飲奶啦，唔好係度做甘耐呀！！唔好學壞呀死O靚妹！！讀得書就讀下啦....唔好比男人呃呀......（下刪阿爸教女七千字真言金句）」


其實當年場中的大阿哥和老闆都好鍚我對我好好，常常買一些零食給我。我那個暑假真的很開心是一個很好的回憶。到了中六中七有時我都會拿著功課跑去黃金商場做功課....真的很搞笑。後來入了大學已很少再回去，而黃金商場中很多鋪頭已易手。現在他們全部都各散東西了。


兩個月前在飛機上突然有個小朋友對我講：「姐姐，我爸爸叫我同你講你好醜樣。」興過火屎的我，跟那死O靚仔走去佢阿爸度，那個大叔拿下墨鏡看著我笑說：「讀完書飲完奶啦？！」


我們對望十秒後，大家也引不住笑了起來.....



．
．