想死...............比想死更想死.........

.

上一次幅畫比唔到翟生
我放了入畫盒
後來我飛了
後來.......
我妹以為個盒是垃圾
扔了....

返到香港
而家無左我用左三個月心機的畫....
我想喊
這是給翟生的三週年禮物...

.

失暈事件簿

。

查實我失暈的事從小到大都多不勝數，唔見左的野不計其數，多一件唔多少一件唔少。體積細的東西如，髮夾，膠筋，筆等，眼脻毛，唇膏，我家總有比人十倍存貨，因為不消一會，我就會全部唔知飛左去邊。很多時候出街都會唔記帶銀包去到車站才知....無數次落的士才知身上一蚊都無，要家人朋友下來找數。


早前陣子往外站出發，放了大假後，返工總是.....周身唔聚財。在家裡出門口已總覺得有漏了什麼什麼似的。不過我總會 ignore 這感覺，因為每次出街都係甘。在飛機做做做做做做做做....噢！下機了，同事們約了出街吃飯我衝衝衝走人，很想快點吃飯呀他媽的肚餓。別問我為何不在飛機吃飛機餐，當你每天也吃同樣的雞飯，牛飯，豬麵，魚薯，用眼一看便知係咩味的時候，比你食龍肉都無味。


我一直走走走，過海關又只是 show pass 都可以。直到上車去酒店我才知....我．個．手．袋．死．左．去．邊？？！！！我面青青的走去和同事說，同事走去跟經理說。我第一個反應不是擔心個手袋，而係驚比人鬧死....因為大家也累要到酒店休息。如要被耽誤了時間，某些高級又脾氣不好的同事真係立即會西爆你面。


機長和經理走來安慰我，我叫他們先走我回機場找，自己搭的士回酒店。 Captain 突然望著我大聲說：「 I WONT LEAVE MY TEAM !！ Let's find it together ! 」 嘩！！！好 MAN 呀！立即感動得眼有淚光....心裡想著：「 Captain 你有女朋友嗎？」


因為 Captain 的吹雞，大家也很努力的為我找 ground staff （而我卻一面驚慌失措的在發呆.....我想現場有不少同事心想都想升我幾巴）。擾攘了一輪，最後 ground staff 在飛機尾找到了手袋，而我可以在翌日上機時找地勤人員拿回。YEAH !!!


真係好多得一班好同事，大家也在車上安慰我。查實我個心已經飛了想想今晚食咩餸了^^。到了酒店房換衫時.... Crap ! 我無帶褲，無論係出街的褲和睡褲都無呀我頂自己個肺！（我們尊貴的公司是不容許我們穿制服出街吃飯的....總不能 T shirt 加涼鞋襯公司條至 yea 血紅裙出街甘有型嫁 ma ...) 嗚......無得出街食飯了，別忘了高鬥的我在飛機無吃飛機餐呀。最後....我等大家也出了去食飯，便在酒店叫了一個食之無味的爛炒飯...


食唔飽又睡不好......嗚很想哭.....


＿＿＿＿＿＿＿＿＿＿＿＿＿＿＿＿＿





上一次去 San Francisco 因為無帶鞋，最後運動褲加公司高跟鞋去Berkeley買東西.....Berkeley的死山路行到我腳斷。足之，未返到酒店對鞋就爛Ｑ左，最後要著住隻爛鞋飛番香港。加上那天下大雨，我拿著一把紅色的姣婆傘子，頭髮又長又被風吹亂，看上去我像一個神精失常的失婚婦。





當日又涷我又唔夠衫又下大雨又無鞋，點解的仲要死去Berkeley。因為我要買一張翟生一直好鐘意但又無買的 poster 。我返到香港就發燒病左啦.....





咪呢張爛紙囉。竟然要８蚊美金，我寧願用八蚊買金城武 poster 囉！ 返到 SF 我立即去了買鞋行街。





。

Damn ....

。

今天終於有機會開開心心拍了一日拖
明天又要飛了...嗚....又要返工
（雖然我剛放了五天假....）
翟生送我回家後 ３０秒
發現未比幅畫佢
我開門大口叫：「翟生！」....頂...無人應
佢電話因為睇戲時關左無開番機
我唯有拿拿林跑出去搭電梯飛落街
電梯呀 電梯呀 你肯死上來未呀？！
狂奔途中....踩了坑渠蓋.....仆了街...
終於來巴士站...

無
左
人

Damn ...
只差３０秒
就是３０秒
我看著車尾說 沙 yo 啦啦
回家時一面憤怒無奈
坐在長椅有幾個金毛死飛仔吹口哨大叫
「靚女，幅畫好正 bor !做咩著甘少布甘性感呀！」
憤怒掩蓋了我原本都已經無咩的理智
「吹咩吹！甘叻返屋企吹你老豆啦！」




。

齊齊泡泡浴

.

飛完一班長途機真的會累到甩肺.....加上乘客下機後，你不能想像飛機簡直是一個巨型的垃圾筒，在地上呀有：報紙，杯呀，碟呀，毛毯食物一地也是，上星期見到廁所有一排假牙，地上又有用過的尿布，我更見過.....血紅的M巾在椅子背貼著....，天呀，我想知我的客人是人類嗎！有次客人下機後我看到地上有一埋頭髮....他媽的！客人悶得要在機上剪頭髮自娛......


下機後和機師和男友在酒店穿著制服鬼混的事，真係....你諗多左o羅！呢個情節只會在TVB出現。長途機下機後，眼脻毛都甩了半排下來，甩頭甩髺不在話下，全身汗味飛機味，還有倒在身上的紅酒味，收 tray 收到一身都係的乳酪味.....機師都心諗 : 死開！!


所以有潔癖的我，每次下機都恨不得把自己全身的皮撕下來。到了外站洗澡然後睡覺是必然的指定動作。關於洗澡我和靜香都一樣呀，很很很愛洗澡！洗澡很舒服呀！ 首先在花灑下沖沖身，把所有塵垢沖走，然後開熱水， 加入這個紫羅蘭起泡浴皂在水龍頭下起泡





隨著蒸氣很快便會聞到清清的紫羅蘭香味
當有泡泡時 我會放下浴鹽
這個是專門為減壓的浴鹽 放在水中有幽幽的香味
而且這有舒緩疲累的作用





浸在泡泡中 最重要是深呼吸
那清清的香味可以把我從疲累的軀殼拉出來
（脫殼！）
加上一支全身磨沙 Body scrub
足以滿足我要潔癖的慾望





每次我浸到甩皮都唔想起身唉～～
有次翟生工作後我調給他浸一個薰衣草泡泡浴
（係....我真係好得閒無事做！）
我差點浸死左翟生
因為他水中睡著了
我知他心中一定想：JessJess可唔可以同我浸一個癩蛤蟆想食天鵝浴～～
水的熱力，香味和浴鹽的舒緩作用
真的可以在鬼門關把快累死人救回
喂！快累死的朋友 齊齊來浸浴吧



浴鹽：Bath & Body Works ( 大約 USD : 15 )
Body scrub : Bath & Body Works( 大約 USD : 20 )
花香起泡皂：Lush （HKD 50 )
。

.

謝謝這一二三年

。



昨天我躺在翟生的腳上，
他用手捲著我頭髮說：「有條白頭髮..係咪做野好辛苦？」
想想.....原來自己已經唔係青春少艾了
唉....我還常以為自己係１８歲...嗚.....
翟生：「Amy 剛剛生日，原來我們一起三年了」
Amy 在三年前去歐洲前生日，我在歐洲認識她和翟生
一個做了好朋友，一個做了我男朋友





記得那年我們一起在威尼斯街上亂蘯
背著大背囊在火車站追火車
在火車上吃了幾餐麵包，
蹲在地上看人畫畫成個鐘
再偷走啤酒屋的餐牌
原來已經三年了
記憶都是那麼遠這麼近





我的畫完成了
F.I.N.A.L.L.Y 完成了
我很享受每一筆油上顏色的感覺
因為我在畫出那甜甜的回憶（yeah ! 作嘔啦！）
翟生說會買一個畫架掛起我的畫在他的書房
Thanks my dear ! Love you !





這三年
我每一天都很開心
我知你盡了很大的努力去愛我
令我可以安心做一齊自己想做的事
真的真的
謝謝你的愛

（嘩哈哈！一年一次！大家別嘔啦！）




。

鯨魚肚

.




雪糕當飯食的夏天又來了
雖然我飛左去得４度的寒冷地方
但都係磨滅不了我要一個人鯨吞一盒雪糕的意志
當你在街上見到，一個癲婆拿著一盒家庭裝雪糕狂食時
請別猶疑，大叫我的名字啦！





講到雪糕
New Zealand Natural 是我的至愛呀！
在香港廿幾三十蚊一杯食一啖
我頂你吖，食到我破產到滿足唔到我丁丁的慾望
天生飢民我前世係餓死的
我就再挑戰自己極限
飯後，去買了一盒 946 ml 的 cookies and cream





食左２０分鐘
我發現用手拿著雪糕盒在街吃
下面的雪糕會變成湯....溶Q哂
（我應該在飛機偷些乾冰，包褢雪糕周圍）
一路行返酒店，翟生不斷吱吱地發出：比一啖我食得唔得...
我也慷慨地分了一些湯給他喝
最後我一個人用了３０分鐘
食。哂。成。盒。
出奇的...
回到酒店
我仍可吃下一個蘋果和兩片餅乾
翟生：我真係要努力工作，原來呢個世紀仲有餓死老婆瘟臭屋的可能......

.

永遠黑色的一天

.


毋忘六四


＿＿＿＿＿＿＿


堅持唔用微博，是因為我還好珍惜現在在香港仍有的點點思想自由，言論自由！我仍珍惜我手打我想的權利。唔想支持獨材網站！唔想我要平反六四的留言隨便被人河蟹刪除！


。